kandilang kumukuti-kutitap
umaandap-andap
sa makapal na karimlam
lumalaban, nakikipagtagisan
sa malakas na bagyong umiihip
bumubuga sa mumunti niyang apoy
hinihigop, sinisinghot
ang lahat ng hanging kayang hingahin
sinisimot ng timawang
mitsa ang kahuli-hulihang
patak ng lusaw na esperma
at bago pa muling sumikat ang araw
wala nang matitira
kundi tumagas na kaluluwa
at marka ng natuyong patak ng luha
kasama ng mga buhok
at kalansay na 'di na makikilala
sa loob ng nitso
mamayang hapon, isang kandila
ang muling sisindihan
sa harap ng aking lapida
--xe061803
No comments:
Post a Comment